مصممة الأزياء« هبه أيمن» تبدع في صيحات عالم الموضة والأزياء
حوار/ محمد خالد زين العابدين
عزيمة قويّة تتحلّى بها« هبه أيمن»،فهي لا تتخلّى عن أحلامها، تحفظها وتطوّرها حتى تحقّقها، تؤمن بقدرات كلّ أمرأة عربيّة وتشجّعها على المضيّ نحو إنجازات تليق بذكائها، موهبتها وتميّزها، في الأزياء، هي صاحبة نظرة مستقبليّة، تجمع في تصميمٍ واحد بين تناقضاتٍ جميلة، فتنسج الأنوثة على هواها وبطعمٍ جديد، فهي فتاة لم يحالفها الحظ لتحقيق حلم طفولتها، و برغم ذلك سعت بخطواتها لطريق تحقيقه، تلك الفتاة هي إبنة مركز مغاغة التابع لمحافظة المنيا دعمت الكثير من الموهبين في جميع المحافظات المصرية، وحان الآن دعمها.
_ عرفينا بنفسك؟
إسمي "هبه أيمن البلاوي" من قرية برطباط تابعة لمركز مغاغة التابع لمحافظة المنيا،عندي 23سنة، طالبة بكلية الآداب قسم الإعلام شعبة الصحافة بجامعة المنيا.
_ كيف أكتشفتي مواهبك في التصميم والرسم ؟
بالنسبة للرسم فمن وأنا في المرحلة الإبتدائية بحب الرسم جدا وقتها شجعتني مدرسة الرسم وكانت لطيفة معايا جداً في التعامل وده خلاني أطور من نفسي،وبعدها أحضر مدرس لي في سنة رابعة علبة ألوان هدية، فرحت بيها جدآ ومن بعد المرحلة الإبتدائية، وإستمريت ف الرسم وخلال المرحلة الإعدادية وأنا بدخل مسابقات كتيرة تابعة للمدرسة و لمركز شباب القرية والمركز إللي أنا منهم وكنت بفوز فيها بالمراكز الأولي دائماً، أما بالنسبة للخياطة وتصميم الأزياء يعود الفضل فيه لأمي، من وأنا صغيرة كنت بافصل لبس للعرايس، لحد مابقيت بعمل لبس لنفسي وكان بيعجب كل إللي بيشوفني، أما التصميم الجرافيتي أو تصميم الجرافيك فبدأ معايا من حوالي تلات سنين.
_كيف كانت بدايتك للدخول في عالم الأزياء؟
الموضوع بدأ كلعبة وأنا في إبتدائى وأنا بخيط لبس وبعمل حاجات كتير كنت بخيط للعيال جيراني و لأصحابي لبس للعرايس وللألعاب بتاعتنا وكنت ببيع القطعة بـ 5قروش أو ببريزة إللي هي 10 قروش، بعدها كبرت وحبيت الموضوع والمجال اكتر بسبب والدتي فقررت وأنا في ثانوية عامة إني أدخل فنون جميلة أو تربية فنية، لكن التنسيق مساعدنيش أدخل أي كلية فنية، فدخلت آداب إعلام وقررت إني أدعم وأساعد كل الموهبين في الظهور علي ساحة السوشيل ميديا وبالفعل ساعدت شباب كتير ولاد وبنات في أنهم يكملوا في طريق تحقيقهم وممارستهم لموهبتهم، ولكن من جوايا كنت بتمني إني أكون أنا كمان بمارس إللي بحبه واخد خطوة فعالة بجد ف طريق تحقيق حلمي، فقدمت في أكاديمية دراسة تصميم أزياء وحلى، دبلومة سنتين معتمدة من جامعة أسيوط ومن الإنتاج الحربي ومن خارجية مصر، علشان خاطر أحقق إللي بتمناه وهو إني أكون مصممة أزياء وكمان إللي حببني في الموضوع أكتر هو أن الأكاديمية دي خلاص بقت بإعتماد إضافي تاني وهو إعتماد من المعهد الأمريكي للعلوم التطبيقية، ودا دافع أكتر إني أطور من نفسي علشان أقدر أطلع شغلي برا مصر.
_ هل لديكي أي موهبة أخرى بجانب التصميم والرسم؟
نعم عندي مواهب تانية وهوايات بجانب الرسم السريالي والتصميم الجرافيكي وتصميم الأزياء، في فترة كدا بدأت أعمل دوبلاج وكنت بلاقي مدح لشغلي في المجال دا وكمان مارست الفوتوشوب والمونتاج وبحب أصور وبعشق شغل هاند ميد.
هل شغلك في الأزياء مقتصر ع كونه مرئي في محيط دايرة معارفك ام تم عرضه في مكان عام قبل كدا ؟
أنا دايماً ببقي مقتصرة علي إني أخلي شغلي شبه برايفت بيني وبين العميل وبعدها كل إللي يشوف قطعة علي عميل بيسأله علي تفاصيلها فبيدله عليا بس بعد لما قدمت في الأكاديمية إتعملنا معرض جامد كمشروع تخرج للترم الأول وأنا الشغل بتاعي أتصنف أنه من أفضل القطع التي تم تصميمها وتنفيذها بحيث أنه بيخدم أكتر من مناسبة أو أكتر من فئة عمرية، وعملت كولكشن تصميم وسميته أول رفرفة، بحيث أنه أول كولكشن أترجم أفكاره علي ورق وأنفذها وكمان أخترت إسم الكولكشن "أول رفرفة" نسبة لإسم البراند بتاعي إللي بدأت أخطو لتحقيقه وهو "Rafif".
_ فكرة ان يكون عندك براند بدأت إزاي؟
كنت في فترة كدا بلبس خمار ماليزي شيفون ف سنة 2017 أو 2016 في يوم بجرب إني احط الخمار علي كتفي كدا فـ جه في بالي أعمله زي شيميز واسع زيه زي الخمار كدا بس أغير من شكل لبسه التقليدي، فعملت واحد ليا لونه كان زيتي وصفه كان "مدور من وراء وقدام بس من وراءكان أطول ومن النص فيه فتحة للراس " كان شكله جميل أوي وعجب ناس كتير خالص ناس مختمرة حبوا الفكرة وكمان إللي كانوا بيلبسوا بناطيل حبوا الفكرة بردو بحسي أنه حاجة فضفاضة وكان بيتلبس من تحته قميص متناسق مع لونه أو بيزك، وبعدها كل أصحابي طلبوا مني أعملهم زيها وأصحاب أصحابي واصدقائهم، وفجأة لقيت كل قريتي وقري مجاورة لابسينه من تصميم وتنفيذ أيدي وكنت مبسوطه جداً إن تصاميمي عجبتهم.
هل دراستك وممارستك الخاصة بعالم الفاشون والأزياء مأثرتش على دراستك في الجامعية؟
لا مأثرش خالص، بالعكس بالرغم من اني كنت بمارس موهبتي كشغل منذ الصغر إلا إني خلال دراستي ف الكلية محدش كان ملاحظ دا، بس من بعد لما أعلنت إني قدمت في أكاديمية لدراسة تصميم الأزياء والحلي كل زمايلي ف الكلية بقوا بيشجعوني وبيطلبوا مني أوردارات وبقيت بنفذلهم تصاميم كتير خالص، ودا بقا دافع إني إنتظم في حضوري للكلية علشان أوسع دايرة معارفي، وكمان بعد لما شغلي كان مقتصر بس علي المقربين ليا ولأصحابهم في القري المجاورة ليا بقا شغلي في مراكز ومحافظات تانية مختلفة.
مين مثلك الأعلى في مجال تصميم الازياء؟
مظنش ليا مثل أعلي لأن كل هدفي هو أن يكون عندي حرص شديد على ترك بصمة فريدة ومميزة لي على أرض الواقع وفي كل قطعة أقوم بتصميمها أوتنفيذها، ودا إللي بيخليني أستمر في التطوير من مستوايا.
ما الدافع وراء إنطلاق موهبتك ومن كان مصدر تشجيع لكي؟
الدافع وراء خلق موهبة تصميم وحب الأزياء والخياطة بل حبي للتصميم ككل بجميع أنواعه هو إني عاشقة للتميز والأختلاف، بمجرد الشعور بالموهبة منذ الصغر عملت علي العمل بيها و والدتي هي كان الدافع والركيزة الأساسية لحب للمجال وإكتشاف موهبتي، ومش بس كدا.. لأ دي هي إللي حفزتني علي ثقل تلك الموهبة بالعلم والدراسة للأكاديمية للمجال دا.
ما هي نصائحك لشخص لديه موهبة ويريد أن يصبح مصمم ؟
أفضل نصيحة ممكن إقترحها هي الممارسة وأضيف عليها بعدم الإكتفاء بمرحلة واحدة من التطور، والطموح للأفضل و أن تتحدى نفسك ومتخليش لأي ظروف شخصية تمنع موهبتك.
إرسال تعليق